<p>Qashqadaryo viloyati Qarshi tumanidagi Tallikuron mahallasi odamlari ko&lsquo;kat yetishtirish orqali yiliga 5 martagacha hosil olib, 30-40 million so&lsquo;mgacha daromad topadi.</p>
<p><strong>Xo&lsquo;sh, tallikuronliklar bunga qanday erishyapti?</strong></p>
<p>&ndash; Buning ortida tinimsiz mehnat yotibdi, &ndash; deydi tallikuronlik Akmal Pirimov. &ndash; Tomorqamizda 2020 yil 15 sotixlik issiqxona tashkil qilganmiz. Shundan birinchi yilda ikki marta keyingi yilda 5 marta hosil olamiz. Ya&rsquo;ni, almashlab ekish usulini qo&lsquo;llaymiz. Masalan, bu yil yanvar oyida yerni tayyorlab, fevralda pomidor ekdik. Aprelning oxiridan chiqa boshlaydi. Yetishtirilgan hosil iyun-iyul oyigacha sotiladi. So&lsquo;ng avgustda bir oy dam berib yana sentyabrda bodring ekamiz. Uni esa yangi yilgacha sotamiz. Albatta, bunda isitish tizimiga alohida e&rsquo;tibor qaratamiz. Keyingi yil to&lsquo;liq ko&lsquo;kat ekamiz. Yanvarda ertachi sholg&lsquo;om ekiladi. Hosil 1,5 oyda tayyor bo&lsquo;ladi. Yetishtirilgan hosil bir haftada yig&lsquo;ishtirib sotiladi. So&lsquo;ng rediska urug&lsquo;i sepiladi. U ham 1,5 oyda tayyor bo&lsquo;ladi. Undan so&lsquo;ng bulg&lsquo;or qalampiri ekamiz. Uni sentyabrgacha sotamiz. Sentyabrda esa shivit, kashnich, urug&lsquo;dan ko&lsquo;k piyoz va sarimsoq piyoz ekiladi. Bularni yangi yilgacha pullaymiz. Shu tartibda bosqichma-bosqich davom etaveradi. Xullas yerni bir qarichini ham bo&lsquo;sh qo&lsquo;ymaymiz. Ushbu mahsulotlarni yetishtirish uchun issiqlik ham kerak emas. Termos qilib yopib qo&lsquo;ysangiz bas.</p>
<p>Qalovini topsang qor ham yonadi deganlaridek, imkon izlaganga, intilganga hamisha bir yo&lsquo;l topiladi. Tallikuronga ham oqova suv kelishi muammo, lekin dehqonlar to&lsquo;xtab qolmaydi yer osti suvini chiqarib, ariqlar orqali oftobda oqizib, go&lsquo;ng solingan hovuzga tashlanadi. Undan chiqqan suv esa ekinlarga yo&lsquo;naltiriladi. Shunday qilinsa, suv yo&lsquo;l-yo&lsquo;lakay menerallar bilan to&lsquo;yinadi va ekinga zarar bermaydi.</p>
<p>&ndash; Tomorqaga asosan ko&lsquo;kat ekamiz, &ndash; deydi Akrom Pirimov. &ndash; Hozir yanvar oyining oxirrog&lsquo;ida sepgan sholg&lsquo;omimiz tag olib qoldi. Hademay bozorga chiqaramiz. Albatta, boshida urug&lsquo; sepilgan pushtalarni ustiga simdan yasalgan maxsus dugalar o&lsquo;rnatib, yerparnik qilamiz. Aslida sholg&lsquo;omni sovuq urmaydi, lekin yer parnik ostiga eksa ham tezroq rivojlanadi, ham &ldquo;erkaklab&rdquo; ketmaydi. Chorvamizdan chiqqan go&lsquo;ngni yerga solamiz. Sababi yerni to&lsquo;ydirmasang, u ham haq bermaydi.</p>
<p>&ldquo;Shuncha mehnat va xarajat qilib, sholg&lsquo;omni yetishtirdingiz ham deylik, olingan daromad harajatni qoplaydimi&rdquo;, so&lsquo;raymiz undan.</p>
<p>&ndash; Albattada, qoplamasa yetishtirarmidik, &ndash; deydi dehqon. &ndash; Masalan, o&lsquo;tgan yili sholg&lsquo;omning bir bog&lsquo;ini boshlanishiga 2 ming so&lsquo;mdan, keyinroq 1,5 &nbsp;ming, oxirida ming so&lsquo;mdan sotganmiz. Bir bog&lsquo;da 3 dona sholg&lsquo;om bo&lsquo;ladi. Yarim metr kvadrat joydan 10 bog&lsquo;ga yaqin sholg&lsquo;om chiqadi. Endi bu yog&lsquo;iga &ldquo;kara-kara&rdquo; qilib olaverasiz-da.</p>
<p>Akrom Pirimov faqatgina tomorqada dehqonchilik qilish bilan cheklanib qolgani yo&lsquo;q. Ko&lsquo;kat yetishtirish ishlarini asosan, oila a&rsquo;zolari bajaradi. O&lsquo;zi esa aprelning oxiri may oyining boshi bilan asalari karvonini tortib cho&lsquo;llarga chiqib ketadi. Hozirda 35 oila asalari parvarishlanmoqda.</p>
<p>Shu qishloqlik Alisher Berdiyevning ham 16 sotixlik tomorqasi bor. O&lsquo;zi hech qayerda ishlamaydi. Hovlisidagi yerdan unumli foydalanib, oilaviy dehqonchilik qiladi. Ertachi sholg&lsquo;om, shivit, kashnich, rediska, sarimsoq piyoz, ko&lsquo;k piyoz yetishtirib bozorga sotadi. Yerdan yil bo&lsquo;yi unumli foydalanadi.</p>
<p>Biz borgan kuni kashnich va ismaloq terilib bog&lsquo;lanayotgan ekan.</p>
<p>&ndash; Ko&lsquo;katlarni bozorda ketishiga qarab ekib yetishtiramiz, &ndash; deydi A.Berdiyev. &ndash; Masalan, kuzning boshlanishidan to yozgacha ko&lsquo;kat yetishtiramiz. Sababi o&lsquo;sha davrda ko&lsquo;katga talab oshadi. Ayniqsa, bahorda. Mana bugun ham ismaloq va kashnichlarni olib, qoplarga joyladik. Erta tongda bozorga olib borib, ulgurji sotamiz. Aslida ko&lsquo;kat inson salomatligi uchun ham juda foydali. Ham arzon. Odamlar buni anglamoqda. Shu bois bugun bozorlarimizda bu kabi mahsulotlarga talab oshmoqda.</p>
<div class="gallery-slider">
<div class="gallery-slider__wrap">
<div class="swiper-container swiper-container-fade swiper-container-initialized swiper-container-horizontal swiper-container-autoheight">
<div class="swiper-wrapper">
<div class="swiper-slide gallery-item">
<div class="gallery-item__wrap">&nbsp;</div>
<div class="gallery-item__wrap"><a href="https://uza.uz/oz/posts/tallikuronlik-kokatchilar_354420">Manba</a></div>
</div>
</div>
</div>
</div>
</div>

Tomorqaning foydalari haqida ko‘p gapiriladi. Lekin har qanday holatda ham ko‘p omillar insonning o‘ziga bog‘liq.
Masalan, bugun hovlisida mo‘jaz issiqxona qurib unumli foydalanayotganlar va aksincha bir so‘m foyda topolmay, issiqxona uchun kreditlarni to‘lashdan bosh tortib, davlatni ham bankni ham o‘sha g‘oyani bergan mahalla raisidan ham norozi bo‘lib, portalni “portlatib” yurganlar ham topiladi.

Biz haqimizda

Murojaat